બેનીના કંઠમાં હાલરડાં હોય અને ચપટીમાં ઝીણકુડી ચૂંટી
ચુંદડીમાં સંતાડી રાખેલ હોય છતાં સુખડીની એક જડીબુટ્ટી
મારી નિરાંત હતી ઝાઝેરાં રુસણાં
ને એની મિરાંત બેઉ હોઠ
એક પછી એક એ તો ઠાલવતી જાય.
રુડી વારતાની વણઝારી પોઠ
ખૂટી ના વાવ એમ રાણીનાં ઝાંઝરની ઘૂઘરી ના આજ લગી તૂટી
ગાગરથી ઊલેચે તળનાં ઊંડાણ
ચડે ઠેશ મહીં ડુંગરની ધાર
પછવાડે આવીને કેડીએ નીરખ્યું
આ ફળિયાને લીલાકુંજાર
જળના ટીપાંમાં જાય મ્હોરી પતંગિયાં કે ફૂલોને પાંખ જતી ફૂટી ?
દાણાની મશે એ તો કલબલતા ચોકમાં
ખોબો ભરીને વેરે વ્હાલ
ઓચિંતા જાણે પારેવાની ચાંચમાં
મેં ઊઘડતી દીઠી ટપાલ
ઘોડે ચડીને કિયો પરદેશી આવ્યો : મારો પરીઓનો દેશ ગયો લૂંટી?
બેનીનાં કંઠમાં હાલરડું હોય અને ચપટીમાં ઝીણકુડી ચૂંટી
