મોજું આવે ને બસ એટલી જ વાર પછી વ્હેતી થઇશ આપોઆપ…
હું તો ભૂંસાતી પગલાની છાપ…
છીપલાંની સાથે મને રહેવું ના ફાવે
ને ગોઠડી માંડું તો કોની સાથે … ?
મોજાંને કિનારે આવવાની વાર
ને માણસનું ઋણ મારા માથે… !
વાયરાને કહી દો કે બોલાવે નહીં હવે એમનેમ ડમરીથી માપ …!
હું તો ભૂંસાતી પગલાની છાપ…
સાંજ પડે દરિયો પણ થાકી તો જાય
રોજ પાણીના ઉકેલી વળ;
વાદળ પણ વરસ્યું, ના વરસ્યાની જેમ
હવે કેમ કરી ઉકેલું સળ..!
રેતીના મણકાની માળા બનાવીને ફેરવું છુ દરિયાને જાપ … !
હું તો ભૂંસાતી પગલાની છાપ…
- અંકિત ત્રિવેદી