સવારે જાગવું પડશે ને બિસ્તર છોડવું પડશે,
અનુસંધાન પણ ગઈ કાલ સાથે જોડવું પડશે !
વીતેલા એક દિવસ જેટલી ઉંમર વધી જાશે,
અને કેલેંડરેથી એક પાનુ તોડવું પડશે !
બરાબર હોઠ પર મુકાઈ ગઈ સીગરેટ એ રીતે,
કોઈ દીવાસળી સુધી તિમિરને ચીરવું પડશે !
હંમેશાં એક પગ બીજાથી આગળ થઈ જવા માંગે,
ને બે પગની હરીફાઈ પ્રમાણે ચાલવું પડશે !
સતત ચાલ્યાં કરીને પણ પહોંચાયું નથી ત્યારે,
હવે થાકી જવા માટે ય થોડું દોડવું પડશે !
– ભરત વિંઝુડા
