હોય નહીં સાચો તે સાચો કોઈ દી હોતો નથી,
એમનો ઉત્તર ખુલાસો કોઈ દી હોતો નથી !
એ મળે છે ત્યારે આપોઆપ મેળો થાય છે,
એટલે કે ત્યાં તમાશો કોઈ દી તો નથી !
આપણા ચહેરાની સામે જોઈને બોલ્યા કરે,
આયનો તેઓની સામો કોઈ દી હોતો નથી !
આંખને પૂછો તો કહેવાની કે છે વર્ષાઋતુ,
ત્યાં શિયાળો કે ઉનાળો કોઈ દી હોતો નથી !
જે કહેતા હોય એને ચન્દ્ર દેખાડો તમે,
હોય છે અરધો તે આખો કોઈ દી હોતો નથી !
ત્યાં જ અધવચ્ચે રહેવાનું મને મન થાય પણ,
માર્ગમાં એવો વિસામો કોઈ દી હોતો નથી !
- ભરત વિંઝુડા
![](https://www.kavyadhara.in/wp-content/uploads/2019/05/39568530_116436569299139_2391045552524492800_n.jpg)